Sayt haqqında
Artıq bir neçə aydır əməkdaşlıq etdiyim və sevə - sevə yazılarım səhifələrində dərc edilən Tarix – info saytı mənə doğma olduğu üçün bu qeydləri qələmə almağı borc hesab etdim. Hamlet müəllim saytda əməkdaşlıq təklif edəndə ozum daxilən hiss etdim ki, nə qədər vaxtında edilmiş təkilfdir. İndi elə dövrü yaşayıram ki, artıq öyrəndiklərimi bölüşməyə ehtiyac əmələ gəlib. Belə bir vaxtda Hamlet müəllimin müraciəti lap yerinə düşdü və buna görə ona sağ ol deyirəm. O gündən saytda tarixi hadisələr, interaktiv metodlar,dərslər,pedoqoji təcrübələr və sairlər haqqında məqalələrlə çıxış etməyə başladım. Sayt hazırda öz ətrafına kifayət qədər intellektual müəllim və şagirdlər toplusu yığıb. Sevindirici haldır ki,sayta qoyulan məqalə və materialların da səviyyəsi günü gündən yaxşılaşır. Saytı hər gün izləməklə bir şeyin də şahidi oluram ki, müzakirələrin, irəli sürülən təkliflərin, ayrı – ayrı müəllim və şagirdlərin fikirləri aktual xarakter daşıyır və müasir təhsilə bunun xidməti ölçüsüzdür. İndi sayt həm müəllim üçün, həm şagird üçün, ümumiyyətlə tarixlə maraqlanan hər bir şəxs üçün sanballı mənbəyə çevrilir. Belə davam edərsə yaxın zamanda sayt elektron məkanda öz layiqli yerini tutacaq. Bütün bu dediklərimi qeyd etmək üçün mən qələmə əl atmamışam. Bunlar artıq məlum həqiqətlərdir.
İndi keçirik əsas məsələyə və məni əsasən narahat edən nədir? Mən müəlliməm, təvazökarlıqdan uzaq olmasın, özü də təcrübəli müəllim. Auditoriyaya baxan kimi məni rahat edən məsələ haqqında deyil, ən çox məni gələcəkdə narahat edəcək məsələlər barəsində düşünürəm. Saytı ilk gündən izləyən vaxtdan düşünürdüm ki, görəsən senzuranın olmadığı məkanda bizim müəllim və şagirdlərimiz özlərini necə aparacaqlar. Görəsən şagirdlərimizdə mübahisə mədəniyyəti, özgə fikrini sakit qarşılamaq mədəniyyəti varmı. Son dövrə qədər mən bunu müşahidə edirdim (əhsən bizim şagirdlərə). Amma gəlin səmimi etiraf edək, auditoryamızda səviyyəsizlər də var. Axır zamanlar saytda belələrinə də rast gəlmək olur. Biz o səviyyəsizlərin yazılarını oxumalı və hər gün qanımızı qaraltmalı və vaxtımızı boş – boş şeylərə sərf etməliyikmi? Məgər belə yazılar saytın nüfuzuna xələl gətirmir? Susaqmı, yoxsa belə halların qarşısını alaq? Hər bir şəxsdə daxili senzura olmalıdır. Biz hamımız ona əməl etməliyik. Yoxsa bu saytı az bir vaxt içərisində məhv edərik. Qısası elə edə bilərik ki, heç saytla maraqlanan olmaz.
Debatla məşğul olan zaman uşaqlara deyirdim ki, debatın qızıl qaydalarından biri tolerantlıqdır. Heç vaxt sizin fikirlərinizlə razı olmayan və öz fikrini irəli sürən şəxsin şəxsiyyətinə toxunmayın. Fikrə qarşı fikirlə mübahisə aparın. Nalayiq söz, söyüş, zəiflikdir və yaxud da fikirsizlikdir. Bir daha təkrar edirəm, nalayiq söz sənin zəifliyindir.
Bu çox qorxulu haldır. Hörmətli müəllim və şagirdlər bəs onda nə edək? Ya belələrini saytdan qovmaq lazmıdır, ya da saytda belə hallara qadağa qoymaq və yaxud da belələrinə qarşı ciddi senzura tətbiq etmək lazımdır. Bəs Siz necə fikirləşirsiniz?
Rəylərin sayı:.