31 yanvar
1884 - Xalq Cümhuriyyətinin qurucularından biri, görkəmli ictimai-siyasi xadim Məhəmmədəmin Rəsulzadə (1884-1955) Bakının Novxanı kəndində anadan olub. 1904-ci ildə sosial-demokrat "Hümmət" təşkilatının qurucularından olub. 1908-ci il-də İrana gedərək Məşrutə inqilabında iştirak edib, sonra Türkiyəyə gedib. 1913-cü ildə çarın elan etdiyi amnistiyadan sonra Bakıya qayıdıb və "Hümmət"in əsasında yaradılan "Müsavat" partiyasına rəhbərlik edib. 1918-ci ildə Zaqafqaziya Seymində Azərbaycan fraksiyasına rəhbərlik edib, həmin il mayın 27-də Seymin azərbaycanlı deputatları Rəsulzadənin sədrliyi ilə Azərbaycan Milli Şurasını yaradıblar, 28 mayda Xalq Cümhuriyyəti elan olunub. Cümhuriyyətin süqutundan sonra Rəsulzadə Moskvaya aparılıb, oradan mühacirətə gedib. 1922-ci ildən Türkiyədə, 30-40-cı illərdə Avropada Azərbaycan siyasi mühacirətinə rəhbərlik edib. 1947-ci ildə Türkiyəyə qayıdıb və 1955-ci ildə Ankarada vəfat edib.
1902 - Şamaxı şəhərində güclü zəlzələ böyük dağıntı və tələfat törədib, əhalinin əksəriyyəti şəhəri tərk edib. Şamaxıda 1856, 1861 və 1872-ci illərdə də dağıdıcı zəlzələlər baş verib.
1992 – Azərbaycan Respublikasının Milli Qəhrəmanı Xəlilbəyli Təbriz Xəlil Rza oğlunun şəhid olduğu gün. Azərbaycanın xalq şairi Xəlil Rzanın oğludur. Xəlilbəyli Təbriz 1991-ci ilin sonunda könüllü olaraq cəbhəyə yollandı. Xromord və Naxçıvanik kəndləri uğrunda gedən döyüşlərdə o, qəhrəmanlıq nümunəsi göstərmişdi. Döyüş şücaətinə görə DİN-nin "Boz qurd" mükafatına layiq görülüb. 1992-ci il 31 yanvar Təbriz Xəlilbəylinin son döyüşü oldu. O, qəhrəmancasına həlak oldu.
2006 - Çingiz Mustafayev Fondu və ANS Şirkətlər Qrupunun "2005-ci ilin adamı" mükafatı Heydər Əliyev Fondunun prezidenti, UNESCO-nun Xoşməramlı səfiri, Milli Məclisin deputatı Mehriban Əliyevaya təqdim olunub. M.Əliyeva təhsil sisteminin inkişafında xidmətlərinə, mədəni irsimizin dünyada təbliği üçün gördüyü işlərə, xeyriyyəçilik fəaliyyətinə görə bu mükafata layiq görülmüşdü.
Rəylərin sayı:.